-
الصفحة الرئيسية
بياع وشوش
.
بياع وشوش
مين يشتري مني الوشوش
كـــل الوشوش
متفصلة و مرسومة عال
من غير رتــــوش
من كل لون , من غير عيون
علشان ضميرك ما تشوفوش
مين يشتري مني الوشوش
قّرب و خدلك يللا وش
علشان تكون قادر تغش
تعمل ملاك , طيب حنون
و كـــمان شــيطان
لأخــــوه يخـــون
أو وحش كاسر من الوحوش
مين يشتري مني الوشوش
عندي مُهرج بهلــوان
لو كنت بتحب الجـــنان
جـــرب و شــوف
هتلاقي حواليك الألـــوف
بس لغــباوتك يضحكوا
من غير سبب و لا يفهموش
مين يشتري مني الوشوش
عندي و شوش من غير عقول
و لا ليها في التفكير أصول
هيكل و فاضي عايش و راضي
و لا عمره ينطق أو يقول
و إسمه حتى ما يعرفوش
مين يشتري مني الوشوش
عاوز تكون كداب متين
خد لك قــــناع الكدابين
و ان قلت حتى يا ليل يا عين
الناس تصدق كلمتك
و لغيرك انت ما يسمعوش
مين يشتري مني الوشوش
الحق و خدلك أي نوع
مكر و غباء
ضحك و دمــــوع
في زمن اللي ماتوا
و لا اخــــتشوش
مين يشتري مني الوشوش
بقلم Lamoosh
